🚩🕉️ वारकरी संप्रदायाला पडलेलं दिव्य स्वप्न – गुरुवर्य बाबा पूज्य ह.भ.प. महंत उद्धवजी महाराज मंडलिक, नेवासेकर…🕉️🚩

गुरुवर्य बाबांच्या ४७ व्या अभिष्टचिंतन सोहळ्यानिमित्त हा लेख –

लेखक
श्री. बाळासाहेब सिताराम झिने
मु.पो. हिंगोणी, ता. नेवासा, जि. अहिल्यानगर

“अवघाची संसार सुखाचा करीन, आनंदे भरीन तिन्ही लोक” या माऊलींच्या वचनाला जणू देह प्राप्त झाला तो सरला बेटाच्या परंपरेतील महान संत, ब्रह्मलीन सद्गुरु नारायणगिरीजी महाराज आणि त्यांच्या कृपाछायेत फुललेल्या नेवासाच्या प्रसादरूपी रत्न – गुरुवर्य बाबा उद्धवजी महाराज मंडलिक यांच्यामध्ये. नेवासाच्या पुण्यभूमीत सुरू झालेला त्यांचा आध्यात्मिक प्रवास आजही अखंड, ओघवता आणि सर्वसमावेशक आहे.

बाबांच्या व्यक्तिमत्त्वात प्रभाव आणि कोमल स्वभाव यांचा अद्भुत संगम आहे. भेटीस आलेला प्रत्येक जण पहिल्याच भेटीत आपलेपणाने न्हाऊन निघतो. बाबा केवळ अध्यात्माचे नव्हे तर सर्वच क्षेत्रातील तरुण‑ज्येष्ठांचे खरे मार्गदर्शक बनले आहेत. तन‑मन‑धनाने साधकांच्या पाठीशी उभे राहून त्यांनी अनेक मठ‑मंदिरांना सरकारी मदत मिळवून दिली; विखे पाटील परिवाराशी असलेला त्यांचा आत्मीय संबंध हेच दर्शवतो.गावोगाव धार्मिक कार्यक्रमांत जुन्या‑नव्या पिढीचा सुंदर मेळ घालून बाबांनी वारकरी कार्याला नवी उंची दिली.

सूरेगाव‑नेवरगाव येथील गोदावरीवरील पूल असो किंवा नेवासा परिसरातील इतर विकासकामे – माऊलींच्या सेवेच्या नावाने बाबांनी केलेला हा संघर्ष शेतकरी, वारकरी आणि विद्यार्थ्यांच्या उद्धारासाठीच.आश्रमातील लेकरांवर बाबांची अपार माया. शंभरहून अधिक मुले वारकरी शिक्षण घेत असताना, एवढ्या कार्यभारातही बाबा स्वतः हरिपाठ‑गीतापाठ, भजन आणि गप्पांमधून त्यांच्या मनातील कोवळेपणा जपतात. “हा वेळ माझ्या लेकरांसाठी” असे म्हणत सायंकाळी त्यांना दिलेला वेळ हेच त्यांचे खरे

संतस्वरूप.गुरुवर्य बाबांचे कार्य पाहिले की जाणवतं – देहरूपाने नारायणगिरी महाराज गेले असले तरी त्यांचा आत्मा जणू बाबांमध्येच विसावला आहे. दोन संस्थानांचा व्याप, कीर्तन‑प्रवचन, सततच्या भेटीगाठी, उदंड समाजकार्य असूनही बाबांच्या चेहऱ्यावर ना तणाव, ना थकवा. त्यांची वाटचाल आज स्पष्ट संतत्वाकडेच आहे.

आमच्यासाठी गुरुवर्य बाबा म्हणजे साक्षात पांडुरंग. आमच्या असंख्य चुका पोटात घालून त्यांनी आम्हाला घडवलं, उभं केलं. लोखंडाला परिसस्पर्शाने सोनं व्हावं तसं आमचं आयुष्य बदलून गेलं. बाबांच्या चरणी नतमस्तक झालं की “जन्माला आल्याचं सार्थक झालं” असं वाटतं.

आज बाबांचा अभिष्टचिंतन सोहळा. भगवान पांडुरंग चरणी एकच प्रार्थना –* “देवा, हवंतर आमचं आयुष्य कमी कर; पण आमच्या या पांडुरंगाला, गुरुवर्य बाबांना, समाजकल्याण आणि वारकरी संप्रदायाच्या सेवेकरिता उदंड, आरोग्यमय आयुष्य दे.

गुरुवर्य बाबांच्या चरणी शाष्टांग प्रणाम…,,

.