नेवासा
देशातील अग्रगण्य आणि संशोधनपर परंपरेसाठी प्रसिद्ध असलेल्या महात्मा फुले कृषी विद्यापीठ, राहुरीच्या कुलगुरू म्हणून नामवंत मृदशास्त्रज्ञ डॉ. विलासराव खर्चे यांची नियुक्ती महामहीम राज्यपाल आचार्य देवव्रत यांनी जाहीर केली आहे. उच्च दर्जाच्या संशोधनासाठी आणि मृद विज्ञानातील मूलभूत, प्रायोगिक व शैक्षणिक कार्याच्या भक्कम पायावर ही निवड झाल्याचे मानले जाते.
या नियुक्तीबाबत कृषीशास्त्रज्ञ डॉ. अशोकराव ढगे यांनी डॉ. खर्चे यांची प्रत्यक्ष भेट घेऊन मनःपूर्वक अभिनंदन केले. विद्यापीठाचे शैक्षणिक सामर्थ्य, नव्या जातींची निर्मिती, आधुनिक तंत्रज्ञानावर आधारित शिफारसी आणि संशोधनपर कार्य देशभर गाजत असून, त्याचा थेट लाभ शेतकरी, संशोधक आणि कृषी पदवीधरांना होत आहे.
देशभरातील अनेक उच्च पदस्थ अधिकारी, संशोधक, प्राध्यापक आणि तज्ज्ञ या विद्यापीठातून पदवीधर झाले असून त्यांनी आपल्या उत्कृष्ट कार्याने संस्थेचा नावलौकिक वाढवला आहे. राष्ट्रीय आणि आंतरराष्ट्रीय पातळीवरही विद्यापीठाच्या संशोधनाच्या गुणवत्तेला मोठी प्रतिष्ठा लाभली आहे. अशा संस्थेच्या कुलगुरूपदी होणारी नियुक्ती स्वतःमध्ये एक मोठा सन्मान मानली जाते.
डॉ. खर्चे यांच्या नेतृत्वामुळे विद्यापीठाच्या संशोधन परंपरेला आणखी बळ मिळेल, असा आशावाद शैक्षणिक व कृषी वैज्ञानिक वर्तुळात व्यक्त केला जात आह
