जिल्ह्यातील डॉक्टर व्हायची इच्छा असणाऱ्या विद्यार्थ्यांसाठी नवी सुवर्णद्वारं उघडी!
नेवासे— शिक्षण क्षेत्रात सातत्याने गुणवत्ता आणि सेवाभाव जपणाऱ्या शरदचंद्रजी पवार होमिओपॅथिक मेडिकल कॉलेज आणि हॉस्पिटल, श्रीरामपूर या संस्थेने आणखी एक ऐतिहासिक टप्पा पार केला आहे. नॅशनल कमिशन फॉर होमिओपॅथी, नवी दिल्ली तर्फे या महाविद्यालयाला शैक्षणिक वर्ष २०२५-२६ साठी बी.एच.एम.एस. अभ्यासक्रमाच्या प्रवेशासाठी अधिकृत परवानगी देण्यात आली आहे.
या निर्णयामुळे अहिल्यानगर जिल्ह्यासह राज्यभरातील वैद्यकीय क्षेत्रात करिअर घडवू इच्छिणाऱ्या विद्यार्थ्यांसाठी नवी आशा आणि संधीची दारे खुली झाली आहेत. श्रीरामपूरच्या या संस्थेने गेल्या अकरा वर्षांत होमिओपॅथी शिक्षणात गुणवत्ता, शिस्त आणि मानवी मूल्यांचा उत्तम संगम घडवून एक वेगळी ओळख निर्माण केली आहे.
महाविद्यालयात अनुभवी प्राध्यापक वर्ग, अत्याधुनिक प्रयोगशाळा, सुसज्ज वाचनालय आणि आधुनिक वैद्यकीय उपकरणांनी सुसज्ज रुग्णालयाच्या माध्यमातून विद्यार्थ्यांना सर्वांगीण प्रशिक्षण दिले जाते. “विद्यार्थ्यांमध्ये सेवाभाव, शास्त्रीय दृष्टिकोन आणि समाजसेवेची नाळ दृढ करणे हेच आमचे ध्येय,” असे महाविद्यालयाचे अध्यक्ष डॉ. बाळासाहेब शिवाजीराव पवार यांनी सांगितले.
प्रवेशासाठी इच्छुक विद्यार्थ्यांनी CET CELL महाराष्ट्रच्या अधिकृत संकेतस्थळावरून पुढील सूचना आणि वेळापत्रक तपासावे, असे आवाहन प्रशासनाकडून करण्यात आले आहे.
शैक्षणिक क्षेत्रात गुणवत्ता आणि समाजसेवेचा संगम साधणाऱ्या या संस्थेची ही परवानगी केवळ महाविद्यालयाच्या प्रतिष्ठेची मान्यता नाही, तर महाराष्ट्रातील होमिओपॅथी शिक्षणाचा गौरव वाढवणारा क्षण आहे.
