नेवासा
शहरात घडलेल्या चैन स्नॅचिंगच्या घटनेत नेवासा तालुका ऑटो रिक्षा संघटनेच्या पदाधिकारी व चालकांनी दाखवलेल्या सतर्कतेमुळे एका वृद्ध महिलेचे गळ्यातील सोनेरी गंठण सुरक्षित परत मिळाले आहे. या प्रसंगामुळे संघटनेच्या सामाजिक बांधिलकीची पुन्हा एकदा प्रचिती आली.
घटनेनुसार, शहरातील एका वृद्ध महिलेच्या गळ्यातील गंठण अचानक गायब झाल्याचे लक्षात येताच त्यांनी तात्काळ रिक्षा संघटनेच्या सदस्यांकडे धाव घेत मदतीची विनंती केली. परिस्थितीचे गांभीर्य ओळखून संघटनेच्या पदाधिकाऱ्यांनी व चालकांनी तत्काळ परिसरात शोधमोहीम सुरू केली. संशयित हालचालींवर लक्ष ठेवत चौकशी केली असता एका महिलेच्या पिशवीतून संबंधित गंठण हस्तगत करण्यात आले. त्यानंतर त्या महिलेला पुढील कारवाईसाठी पोलिसांच्या स्वाधीन करण्यात आले.
या प्रसंगात रिक्षा चालकांनी दाखवलेली जबाबदारी, धैर्य आणि तात्काळ कृती यामुळे संभाव्य मोठा गुन्हा उघडकीस आला. नागरिकांकडून संघटनेच्या या कार्याचे मनापासून कौतुक करण्यात येत असून, समाजरक्षणासाठी सदैव तत्पर राहण्याचा निर्धार संघटनेने व्यक्त केला आहे.
नेवासा तालुका ऑटो रिक्षा संघटना केवळ प्रवासी सेवा देणारी संस्था नसून, शहराच्या सुरक्षेतही सक्रिय सहभाग नोंदवणारी सामाजिक शक्ती असल्याचे या घटनेतून अधोरेखित झाले आहे.
