” गरीब विधवेला दिला आधार – खाकी वर्दीतील माणुसकीचं जिवंत उदाहरण
नेवासे
नेवासे तालुक्यातील मक्तापूर येथील एका गरीब कुटुंबातील विधवा महिलेने आपल्या कष्टाच्या पैशांतून जवळपास ९० हजार रुपये एका पतसंस्थेत ठेवले होते. सफाई कामगार म्हणून रोजचा घाम गाळून, रात्रंदिवस श्रम करून तिने एक एक रुपया जमवला होता. परंतु दुर्दैव असे की, त्या पतसंस्थेने तिचे पैसे परत देण्यास टाळाटाळ सुरू केली.
तीन वर्षे तिच्या आयुष्या अशाच फेऱ्यांत गेली. पतसंस्थेच्या दरवाजात वारंवार निराशा पदरात पडली. शेवटी आशेचा किरण म्हणून तिनं नेवासा पोलीस स्टेशन गाठलं.
त्या वृद्ध अशक्त महिलेने खाडे साहेबांसमोर जेव्हा आपल्या दुःखाची कहाणी सांगितली, तेव्हा तिच्या डोळ्यातील अश्रू थांबेनात. एक आई, एक कष्टकरी स्त्री म्हणून तिच्या भावना ओसंडून वाहत होत्या. तिला पाहून खाडे साहेबही थबकले… त्या अश्रूंमागचं दुःख त्यांनी ओळखलं.
मग काय, खाकी वर्दीतील माणुसकी जागी झाली! खाडे साहेबांनी संबंधित पतसंस्थेच्या कर्मचाऱ्यांना पोलीस ठाण्यात बोलावलं आणि पोलिसी शब्दांत जाब विचारला. फक्त दोन तासांत त्या महिलेचे संपूर्ण ९० हजार रुपये तिला परत मिळाले.
***खाडे साहेब नसते तर मला पैसे कधीच मिळाले नसते असे भावनिक उदगार त्या महिलेने काढले व साहेबांचे धन्यवाद मानले***
“
