नेवासा : नेवासा परिसरात बेकायदेशीर देशी दारू विक्रीचा डाव फसला! टाकळीभान गावातील एक इसम गावठी हातभट्टी दारूने भरलेले ड्रम घेऊन नेवासा येथे विक्रीसाठी येत असताना पोलिसांनी त्याला रंगेहाथ पकडले. या कारवाईत तब्बल ६४ हजार रुपयांचा मुद्देमाल जप्त करण्यात आला आहे.
मिळालेल्या गोपनीय माहितीनंतर परिविक्षाधीन पोलीस उपअधीक्षक संतोष खाडे यांच्या नेतृत्वाखाली ही धडक कारवाई करण्यात आली. बाबासाहेब गीताराम सावंत (वय ३१, रा. टाकळीभान, ता. श्रीरामपूर) हा इसम मोटारसायकलवर चार काळे ड्रम घेऊन नेवासा रोडने जात असताना पोलिसांनी त्याला अडवले.
ड्रमची तपासणी केली असता, त्यामध्ये १४० लिटर बेकायदेशीर गावठी दारू आढळून आली. १४ हजार रुपयांची दारू आणि ५० हजारांची मोटारसायकल असा एकूण ६४ हजारांचा अवैध साठा जप्त करण्यात आला.
दारू विक्रीसाठी नेवासा सारख्या ग्रामीण भागांची निवड करून सामाजिक विषप्रचार करणाऱ्यांविरोधात पोलिसांचा बडगा उगमाला येतोय, असे या कारवाईवरून स्पष्ट होते.
या प्रकरणी सावंतविरुद्ध गुन्हा दाखल करण्यात आला असून पुढील तपास पोलीस हवालदार अजय साठे करत आहेत.
ही यशस्वी कारवाई पोलीस अधीक्षक सोमनाथ घार्गे, अप्पर पोलीस अधीक्षक वैभव कुलबुर्मे, तसेच शेवगावचे पोलिस अधिकारी सुनील पाटील यांच्या मार्गदर्शनाखाली संतोष खाडे, विकास पाटील, अजय साठे, आप्पासाहेब तांबे, नारायण डमाळे, भारत बोडखे व गणेश जाधव यांच्या पथकाने केली.
